სეზონური ხილი და ბოსტნეული ბუნებრივ ვიტამინებთან, სწორ კვებასთან, ჯანმრთელობასთან ასოცირდება, თუმცა ისინი შეიძლება ადამიანისთვის მძიმე დაავადებების მიზეზიც გახდეს. არაკეთილსინდისიერი ფერმერი, რომელიც მხოლოდ მისი ბიზნესინტერესით მოქმედებს და მატერიალურ კეთილდღეობაზე ფიქრობს, იმისთვის, რომ ხილი, უფრო დიდი, მკვეთრი ფერის თუ სუნის და მეტად მომხიბვლელი გახადოს, საჭიროზე მეტ ნიტრატს იყენებს. ასე მოწეული მოსავალი უფრო მომგებიანია, რადგან ძვირად იყიდება და დიდხანსაც ინახება. ჯანსაღი ხილის შერჩევა კი, მომხმარებლისთვის შეუიარაღებელი თვალით შეუძლებელია. არადა, ნიტრატების ნორმაზე დიდი ოდენობა ჯანმრთელობისთვის საშიაშია. მაღალნიტრატიანი საკვების რეგულარულად და ხანგრძლივი დროით მიღებამ შეიძლება გამოიწვიოს ინტოქსიკაცია, მწვავე ალერგია, კუჭ-ნაწლავის სიმსივნე, დერმატოლოგიური და რეპროდუქციული პრობლემები. როგორც მედიკოსები ამბობენ, ნიტრატი, ადამიანის ორგანიზმში მოხვედრის შემდეგ, საშიშ შხამად გარდაიქმნება. ფეხმძიმე ქალებში, ნიტრატებით მდიდარი საკვების დიდი რაოდენობით მიღების შედეგად, ჩნდება ნაყოფის დაზიანების საფრთხე. მეძუძურ დედებში, ხდება ლაქტაციის შეწყვეტა. ერთ წლამდე ასაკის ბავშვებში ფერხდება განვითარება.
ტოქსიკოლოგი ეკა ქურდაძე გვიდასტურებს, რომ სეზონის მოახლოებასთან ერთად, კვებითი ინტოქსიკაციით მიმართვიანობა კლინიკებში მნიშვნელოვნად გაზრდილია, თუმცა არა საგანგაშოდ. ჯერ არც მძიმე შემთხვევები დაფიქსირებულა.
აგროქიმიის დასაწყობება-რეალიზაცია-გამოყენების ჯაჭვის კონტროლი სურსათის ეროვნული სააგენტოს მოვალეობაა. ჯერ კიდევ შარშან იყო ცნობილი, რომ პესტიციდების გამოყენების წესების დარღვევა მეურნეობებში ხშირია. მაშინ სააგენტოს მცენარეთა დაცვის დეპარტამენტის უფროსმა ნიკა მესხმა გვითხრა, რომ ფერმერების ცნობიერების ამაღლებაზე უფრო მეტად მუშაობენ, ვიდრე სანქცირებაზე. შარშანვე დაანონსდა ფერმერთა რეესტრის შექმნაც, სადაც უნდა გაერთიანებულიყო სრული ინფორმაცია სად ვინ რამდენ კულტურას აწარმოებს. ამით მიკვლევადობა გაუმჯობესდებოდა და კონტროლიც გაადვილდებოდა, თუმცა პროცესი ამ დრომდე დასრულებული არ არის.
როგორც საქართველოს ხილბოსტნეულის ასოციაციაში გვითხრეს, სათანადოდ ვერც ადგილობრივი მეურნეობები კონტროლდება და ვერც იმპორტი, გამოდის, რომ მომხმარებელი სრულიად დაუცველია.
სურსათის ეროვნული სააგენტო ხილ-ბოსტნეულის უსაფრთხოების გაკოტროლებას ბაზრობებზე, სარეალიზაციო დახლებიდან ცდილობს. სარეალიზაციო ობიექტებზე იღებენ ნიმუშებს და ამოწმებენ შემცველობაზე. ამ ეტაპზე ხილბოსტნეულიდან ყველაზე დიდი მოთხოვნა ე.წ „ახალ ხილზე“ საზამთროზე, ნესვზე, მარწყვზე, ალუჩაზეა. იმის შესამოწმებლად, რამდენად უსაფრთხოა ეს ხილი მომხმარებლისთვის, სურსათის ეროვნულმა სააგენტომ სეზონური მონიტორინგი დაიწყო. უწყებამ, სამგორის ბაზრის ტერიტორიაზე – საზამთროს, ნესვისა და მარწყვის ნიმუშები დალუქა. ყველა საკვლევი ნიმუში იმპორტულია. ამჯერად, უწყებამ მხოლოდ 5 ნიმუში გამოიკვლია, რაც ბაზრის სრულ სურათს არ ასახავს, თუმცა, ამით მონიტორინგი არ დასრულებულა. სააგენტოს ინსპექტირების ჯგუფებმა, სეზონის დასრულებამდე 200-ამდე ნიმუში უნდა შეამოწმონ. სეს-ის არაცხოველური სურსათის და სასმელების სამმართველოს უფროსი მაია გორდაძე “აგრო სიახლეებს” მონიტორინგის შარშანდელ შედეგებსაც აცნობს.
სრული გადაცემა ნახეთ აქ ?
