აგრარულ საკითხთა კომიტეტი პარლამენტის საზედამხედველო ფუნქციიდან გამომდინარე, იწყებს თემატური მოკვლევას – „ფინანსებზე ხელმისაწვდომობა აგრარულ დარგში (კერძო ფინანსური ინსტიტუტების ჭრილში)“. ამის შესახებ აგრარულ საკითხთა კომიტეტის თავმჯდომარე ნინო წილოსანმა კომიტეტის სხდომაზე განაცხადა, სადაც კომიტეტის წევრებსა და დამსწრე საზოგადოებას თემატური მოკვლევის მიზნებსა და ამოცანებზე ინფორმაცია მიაწოდა.
„ჩვენ ყოველთვის აქტიურად ვიხილავთ ფერმერების და სოფლის მეურნეობის სექტორში მყოფი ადამიანების დაფინანსების ინსტრუმენტებს და საშუალებებს. ყველაზე კარგი პრაქტიკა და ევროკავშირის გამოცდილებაც ამას გვიდასტურებს, არის თავად სახელმწიფოს სუბსიდირების მიზანმიმართული ფორმები – პროგრამა, რომლითაც შეგვიძლია ფერმერებს დავეხმაროთ. თუმცა, სოფლის მეურნეობის სექტორის წარმომადგენლებს ასევე უნდა ჰქონდეს შესაძლებლობა, რომ კერძო ფინანსური ინსტიტუტების მხარდაჭერითაც ისარგებლონ. ჩვენი ჯგუფის წევრები ასევე ვთანხმდებით, რომ სოფლის მეურნეობაში ფინანსებზე ხელმისაწვდომობა საფინანსო ინსტიტუტების მხრიდან საკმაოდ დაბალია და გაგვიჩნდა სურვილი, რომ ამ ჭრილში ჩავატაროთ თემატური მოკვლევა, რომლის ამოცანა არის დაფინანსების კერძო წყაროების და კომერციული ბანკების, მიკროსაფინანსო ორგანიზაციების აგროპორტფელის ანალიზი, ასევე სოფლის მეურნეობის განვითარებაზე მიმართული სახელმწიფო პროგრამის „აწარმოე საქართველო“ ანალიზი, ოღონდ იმ ჭრილში, რომ ვნახოთ სააგენტოს საკრედიტო-საგარანტიო სქემა ფერმერების მხარდასაჭერად როგორ მუშაობს“, – განაცხადა ნინო წილოსანმა და დასძინა, რომ თემატური მოკვლევის ფარგლებში განახორციელებენ სოფლის მეურნეობაზე მიმართული ვაჭრობის დაფინანსების წყაროების ანალიზს, ინოვაციური და ალტერნატიული დაფინანსების წყაროებისა და პროდუქტების მოკვლევას და საქართველოს საფინანსო სექტორში მათი დანერგვის სარგებლის განსაზღვრას. ანალიზის შედეგების საფუძველზე შემუშავდება რეკომენდაციები.
თემატური მოკვლევის ჯგუფის წევრები იქნებიან: ნინო წილოსანი, ქეთევან ჩარკვიანი, ირაკლი (დაჩი) ბერაია, მიხეილ დაუშვილი და ალექსანდრე რაქვიაშვილი.
