სად იმალებიან ტკიპები და როგორ დავიცვათ პირუტყვი ბუზებისგან?
ზაფხულის დადგომასთან ერთად საძოვრებზე არა მხოლოდ ბალახი, არამედ სხვადასხვა პარაზიტი და მწერიც აქტიურდება. ტკიპები, ბუზები, კოღოები და შინაგანი პარაზიტები ამ პერიოდში განსაკუთრებით სწრაფად მრავლდებიან და ცხოველების ჯანმრთელობას სერიოზულ საფრთხეს უქმნიან.
სპეციალისტების განმარტებით, პარაზიტებით ინფიცირებულ ცხოველს ხშირად უმცირდება მადა, იკლებს წონაში, ეცემა პროდუქტიულობა და სუსტდება იმუნიტეტი. რძის ფერმებში კი პრობლემა პირდაპირ აისახება რძის რაოდენობასა და ხარისხზე.
განსაკუთრებული საფრთხის შემცველია ტკიპები, რომლებიც სხვადასხვა დაავადების გადამტანებად მიიჩნევიან. ისინი ყველაზე ხშირად მაღალ ბალახში, ბუჩქნარებში, ტყის პირას და ნესტიან საძოვრებზე გვხვდება. ცხოველს უმეტესად ყურების უკან, კისერზე, იღლიებში, კუდის ქვეშ და ფეხების შიდა ნაწილებში ეკვრიან. ამიტომ საძოვრიდან დაბრუნების შემდეგ ცხოველების დათვალიერება განსაკუთრებით მნიშვნელოვანია.
არანაკლებ პრობლემურია ბუზებიც. მათი რაოდენობა განსაკუთრებით იზრდება იქ, სადაც გროვდება ნაკელი, ორგანული ნარჩენები და დგას წყალი. მუდმივი გაღიზიანების გამო ბუზები ცხოველებში სტრესს იწვევენ, ხელს უშლიან ნორმალურ კვებას და ზოგიერთი დაავადების გავრცელებასაც უწყობენ ხელს. შედეგად, პირუტყვი ნაკლებად იკვებება, მეტ ენერგიას ხარჯავს და მისი პროდუქტიულობაც მცირდება.
ვეტერინარები ფერმერებს ურჩევენ, ზაფხულის პერიოდში განსაკუთრებული ყურადღება დაუთმონ პრევენციულ ღონისძიებებს. რეკომენდებულია სადგომების რეგულარული დასუფთავება და ნაკელის დროული გატანა, წყლის გუბეებისა და ჭაობიანი ადგილების თავიდან აცილება, ასევე ვეტერინარის მიერ რეკომენდებული ტკიპებისა და ბუზების საწინააღმდეგო პრეპარატების გამოყენება. მნიშვნელოვანია ცხოველების პერიოდული დათვალიერებაც, განსაკუთრებით ყურების, კისრისა და კუდის არეში, სადაც პარაზიტები ყველაზე ხშირად გვხვდება.
სპეციალისტების თქმით, ერთი შეხედვით უმნიშვნელო მწერებმა და პარაზიტებმა შესაძლოა ფერმერს მნიშვნელოვანი ეკონომიკური ზარალი მიაყენონ, ამიტომ დროული პრევენცია ხშირად ბევრად უფრო ეფექტიანი და იაფია, ვიდრე უკვე განვითარებული პრობლემის მკურნალობა.
გზებზე ნაგვის დაყრასა და პირუტყვის გადაადგილებაზე კონტროლი მკაცრდება. გზების დეპარტამენტში 25-კაციანი სამსახური იქმნება, რომელსაც 6 000 კილომეტრი გზის მონიტორინგი მოუწევს.
თურქულის, როგორც მწვავე ინფექციური და სწრაფად გადამდები დაავადების, რისკები მესაქონლეობაში
ქართული მეცხოველეობის ცოცხალ მემკვიდრეობას და ადგილობრივ ენდემურ ჯიშებს გაეცანით აქ
ხბოს რქების მოწვა აუცილებელია. რატომ, როგორ და რა ასაკში უნდა მოიწვას მსხვილფეხა რქოსნების რქები?
ჩლიქების ჯანმრთელობა პირუტყვის კეთილდღეობის საფუძველია. პირუტყვის ჩლიქების მოვლის აუცილებელი წესები
ხბოს ჯანმრთელობა უნდა შეფასდეს მისი ასაკის გათვალისწინებით დაბადებიდან მოზარდობამდე.როგორ შევაფასოთ ხბოს ჯანმრთელობა სხვადასხვა ასაკში?
